اصنعي لعبة البومة من الكروشيه

unnamed (4)

إنهاردة جبت لكم طريقة عمل لعبة البومة كروشيه.
كان نفسي من زمان أعملها لارتباطها بسلسلة روايات هاري بوتر ولأن حبيت أعمل لعبة صغيرة بأيدي أحطها على السرير.
طبعا تقدري تعملي اللعبة دي لأي طفل فوق ال 3 سنين وتديهاله هدية في عيد ميلاده..

أبعادها

أنا عملتها بطول 11 سم وعرض 9 سم، بس تقدري طبعا تغيري المقاس حسب اللي تحبيه.

الخامات المستخدمة 

في طرق كتير تقدري تغيري بيها شكل اللعبة بتاعتك تقدري تعملي الجسم بلونين أو لون واحد.
أما العين تقدري تستخدمي دائرتين قماش فوق بعض واحدة أصغر من التانية أو زرارين أو دايرة كروشيه وزرار فوقها..

الأدوات المستخدمة

خيط Medium بمقاس إبرة 5 مم = 7 أمريكي  Premium Acrylic

إبرة كروشيه

(في الباترون هتلاقي أنك تستخدمي إبرة أصغر بمقاسين من الموجود على الخيط بس أنا استخدمت نفس المقاس الموجود على الخيط)

إبرة خياطة

عدد 2 زرار (اختياري)

حشو بوليستر أو قطن أو استخدام بواقي خيط

المهارات المطلوبة

أي مبتدئة تقدر تتفرج على الفيديو وتعملها بسهولة. محتاجة تعرفي طريقة عمل الدايرة Spiral

الغرزة الفردية Sc

بالنسبة ليا أنا شفت الفيديو وغيرت حاجة بسيطة

المستوى

مبتدئ

الوقت

أنا خلصتها في يوم ونص، أكتر جزء بياخد وقت هو الجسم

الطريقه

1-للبداية في طرقتين طريقة الدايرة السحرية (موجودة في الفيديو الجزء الأول) أو أنك تعملي 4 غرز سلسلة وتشبيكهم في دايرة وتعملي 6 غرز فردية في الدايرة sc (الدائرة رقم واحد)

2-دائرة رقم 2: تعملي غرزتين فرديتين في كل غرزة فردية يعني مجموع الغرز في الآخر هيكون 12 غرزة، أستخدمي علامة غرز أو خيط لون بلون مختلف أو مشبك ورق في مكان أول غرزة في اللفة دي.

3-دائرة رقم 3: تعملي غرزة فردية في أول غرزة ثم غرزتين فردتين في الغرزة اللي بعدها (كرري لآخر الدايرة) إجمالي 18 غرزة

4-دائرة رقم 4: هنا هتعملي غرزتين فرديتين ثم غرزتين فرديتين في غرزة واحدة (كرري لآخر الدايرة) إجمالي 24 غرزة

5-داثرة رقم 5: أول ثلاث غرز هتعملي فيهم غرزة فردية واحدة والرابعة تعملي فيها غرزتين فردتين (كرري لآخر الدايرة) إجمالي 30 غرزة

*ملحوظة: الجزء ده هو قاعدة اللعبة وعدد الدواير ده يعتبر كافي بس طبعا لو عايزة اللعبة بحجم أكبر تزودي الدوائر وكل مرة تزودي عدد الغرز الفردية

6-بعد ما تخلصي القاعدة وعشان ترفعي جسم اللعبة، هتعملي غرزة فردية في كل غرزة لحد ما توصلي للطول المناسب ليكي

ولما تخلصي تخلي في خيط باقي بطول 30 سم وتقصيه وشديه عشان تقفلي الغرزة الأخيرة.

unnamed

 7-العينين: زي ما قلت قبل كده في طرق كتير تقدري تستخدمي زرارين كبار (زي في الفيديو) أو دايرتين قماش واحدة أكبر من التانية لكل عين

أو تعملي دايرتين كروشيه ووتخيطي فيهم زرارين أصغر منهم. طبعا لو هتقدميها لطفل صغير يفضل عدم استخدام زراير واستخدام دواير قماش أو كروشيه. لو هتستخدمي دواير كروشيه يفصل استخدام لون مختلف عن الجسم أفتح أو أغمق كتير

unnamed (1)

8-المنقار: برضه المنقار له طرق كتير أسهلها أنك تخيطي في الجسم على شكل مثلث زي اللي أنا عملته أو تستخدمي قماش على شكل مثلث وتخيطيه بين العينين

9-دلوقتي وقت الحشو وزي ما قلت قبل كده تقدري تحشيها بأي طريقة تعجبك.

لو هتستخدمي بواقي خيط حاولي تجمعي جزء منه وتربطيه في دايرة (زي الصورة) وتحطيها أول حاجة في جسم اللعبة وده عشان يساعدها في الوقوف

unnamed (2)

10-بعد الحشو، الديل اللي سيبتيه بطول 30 سم تخيطيه باستخدام إبرة الخياطة وتعملي غرز سوط whip stitch عشان تقفلي اللعبة

(موجودة في الفيديو الجزء الثاني) وخلي بالك أنك متحيطيش حشو كتير في الجزء اللي فوق منها.

unnamed (3)

11- (اختياري) تقدري تعملي شعر ليها والطريقة موجودة في الفيديو تقدري تختاري ألوان مختلفة أو تخليه طويل أو قصير حسب احتياجك

ومبروك عليكي اللعبة الجديدة

لينكات الفيديو هتلاقيها هنا: الجزء الأول والجزء الثاني

وتقدري كمان تنزلي الباترون مجانا من اللينك ده من هنا وهتلاقي فيه كمان طريقة عمل اللعبة بالتريكو

Fantosh

محررة بفريق غزل بنات الكروشيه والتريكو حلم حياتي اللي أتعلمتهم متأخر لسه بتعلم وهفضل أتعلم‎

You may also like...

شاركنا برأيك