بدأنا ازاي

بدايتنا جت إزاي..؟

ديبي:

فكرة الأعمال اليدوية طول عمرها بتبهرني، إن حد يمتهن حرفه و يطلع شغل معمول بإيده ده بالنسبالي شئ يجب تقديره. خلونا نعترف إن الشغل اليدوي بادئ في الإنحدار في مصر (و مقصدش بس المنتج اللي بيطلع و لكن النظره للي بيشتغل كمان) من زمان بعد أخر جيل كان عنده مكن خياطة و قرر إن وقته يضيع أحسن قدام التليفزيون.

إشتغلت شوية و أنا صغيرة بس مكنتش لاقية تشجيع كفاية و لا وسائل تدفعني، مكنش عندنا إنترنت و لا لاقيت محتويات تفيدني قد كده.

و كمان من زمان و أنا مهتمة بالموضة و كان عندي أحلام و طموحات و أغلبها ضاع هباءا. و كبرت و أنا نفسي أوصل لأي حاجة و مش عارفة إزاي.

في سنة 2009 قررت أحط في قايمه الأمنيات بتاعة أول السنة إني أعمل حاجة واحدة من البداية للنهاية، حاجات عليها القيمة، عايزة أحس إني منتجة أو مبدعة، أو كليهما. عايزة أجرب نفسي هنفع و لا لأ و عايزه أحس إن أحلامي مش هتفضل طول عمرها بس أحلام.

بس متشجعتش كفاية

الموضوع نفسه اتكرر في أول 2010

وتاني في 2011

مفيش حاجة

الحاجز بيكبر

أهداف بلا تخطيط

و بعد تشجيع مرير من إصحابي اللي ملهمش فيها بس بيحاولوا يعملوا اللي عليهم و بعد صدفه اني أعرف إن ميادة و هنادي مهتمين بنفس الإهتمامات دي

أخيرا في 2012 قررت أشتري ماكنة خياطة

ميادة:

الحكاية ما تختلفش كتير عن ديبي..

من صغري بحب الاشغال اليدوية، خصوصاً الخياطة ..

والدتي كانت بتعملنا حاجات كتير على ماكينة الخياطة..كنت بلزق فيها واتمنى اقعد زيها كدا فى يوم من الايام..

وفي يوم من حوالي 7 سنين تقريبا طقت فى دماغي اني اجيب ماكينة..

وقتها مكنتش اعرف حاجة غير المباديء اللي بشوف والدتي بتعملها على ماكينتها السينجر اللي مفيش فيها أي اوبشنز غير انها بتخيط..

جبت ماكينة صيني لطيفة كدا، بتعمل حاجات لطيفة برضة..

وقعدت اعافر مع نفسي واعمل حاجات ليا ولاولاد اخويا الصغيرين، ساعات كانت الحاجات تطلع حلوة، وساعات تانية يبقى مصيرها الى المطبخ “مقبرة الاقمشة” 😀

حاولت كتير اتعلم واروح اخد كورس مفيش..

غير الخياطة، كنت بحب استخدم الخامات اللي موجودة فى البيت واطلع منها حاجة، زي الزجاجات البلاستيك، او الشرايط الستان..

ودي مش محتاجة حاجات اتعلمها أد ما كانت محتاجة مني اتفرج على ناس تانية بتعمل نفس اللي انا بعمله وبتطلع افكار جديدة، لكن للاسف حتى دا وقتها مكنش متوفر..ومع الوقت اتنسى..

لحد ما قابلت ديبي وهوندا من سنة او أكتر شوية، واكتشفنا بالصدفة ان احنا التلاتة بنحب الاشغال اليدوية ..

وبدأت انا وديبي فى اننا نتعلم الخياطة بس بشكل احترافي شوية..بعدها بدأت هوندا تهتم بالكروشية، وقتها احنا كمان بدأنا نهتم..

وشوية بدأنا نشوف التريكو..

كل حاجة تقريبا عافرنا نتعلمها من النت ..

…التحدي

:ديبي

 في 2013 قررت أعمل تحدي مع ميادة، هنادي و سلمى و شاركنا عدد من أصحابنا فيه، للمهتمه أو عايزه تتعلم حاجه جديده. ده غير إني بالمشاركه حبيت يبقى عليا مسئولية و ضغط إن في ناس مستنيه مني مشاريع. و لولا التشجيع اللي لاقيته و بالفكره انى بشغلي و المنتجات و المشاريع اللي بطلعها بأشجع اللي محتاج زقه زيي مكنش التحدي ده. نجح

التحدي كان إننا نعمل 12 مشروع بمعدل مشروع في كل شهر يعني حاجه جديدة هتعلمها كل شهر على الأقل

Pinterest بدأت إني ألعب بالمكنة و

و أجرب حظي

شويه قلت أجرب التريكو

و كل شويه بطلع أكتر و بحاول أتعلم أكتر و القايمة بتاعتي بتكبر

الحمد لله التحدي مستمر و دي بعض النتايج اللي طلعت منه

challenge

ميادة:

وجات فكرة التحدي..كل واحدة تعمل قايمة محترمة كدا بالمشاريع اللي نفسها تخلصها خلال سنة، ونبدأ نشتغل عليها

عن نفسي لو ديبي وهوندا كانوا مش معايا، ما افتكرش كنت هكمل، كنت هكسل وهبقى ابطىء كتير، ويمكن كنت اركز اكتر فى اللي عارفاه بس وما ابصش لحاجة تانية..

الموضوع مش صعب ولا خزعبلي على فكرة..شوفوا حد يشجعكم ويشتغل معاكم..

وكل فترة فكروا عايزين توصلوا لايه الفترة الجاية واكتبوا اللي نفسكم توصلوا ليه..

 هنكلم بالتفصيل عن كل مشروع على حده و عن المشاريع اللي بنشتغل فيها كمان في الوقت الحالي

هنشارككم هنا بأفكارنا، واحلامنا ومشاريعنا..

ومحتاجين انكم كمان تشاركونا بأرائكم وأفكاركم..

You may also like...

5 Responses

  1. استمروا يا مروة ويا ميادة وإن شاء الله تكونوا مصدر إلهام لبنات كثيرات 😀

  2. مبروك المدونة الجميلة
    وفي انتظار صفحة فيسبوك

  3. Cinderella says:

    YES!!! BRAVOOOO YA BANAT
    and i cant wait to see the projects and 2014 challenge list =))

  4. dorra says:

    انتو حلوين يا رب تتوفقوا واقلدكم قريب ♥

  5. Sara says:

    دا كلام واقعي وحاصل معايا وفي دروس كتير في الموضوع دا اشكركم بجد

شاركنا برأيك