تحدي 2014

الموضوع

السنة اللي فاتت زي دلوقتي قررنا إننا نتعلم و نعمل حاجة جديدة..

بعضنا بدأ من الصفر و بعضنا كان عنده خبرة مسبقة، بدأنا بتحدي و كان كل اللي في دماغنا إننا نشجع بعض و نتعلم نعمل حاجة و فعلا التحدي الشخصي ده ساعدنا كتير و الدليل هو النتيجة العملية و هي وجود غزل بنات.

السنة دي و تزامناً مع بداية السنة و أجازة نص السنة فكرنا ليه منعملش تحدي جديد للناس اللي معانا في غزل بنات، الفرصة هنا أكبر لأن معانا و معاكم ناس فاهمة أو عندها خبرة، معانا و معاكم ناس هتشجعكم عشان عدت بالمراحل دي كلها قبل كده.

فكرنا نعمل تحدي جديد لـ 2014 كلنا مع بعض…

طيب ايه هي فكرة التحدي؟

ببساطة كل شخص بيختار عدد من المشاريع في اي مجال “خياطة، تريكو، كروشية، تطريز..” عشان ينفذهم فى خلال السنة.

ولو محتاجين معلومات أكتر عن التحدي ممكن ترجعوا للموضوع دا .

ليه تشتركوا معانا في التحدي؟

التجربة: خلونا نتفق إننا منقدرش نقرر إذا بنحب حاجة أو إذا احنا كويسيين فيها إلا لو جربناها، التجربة أفضل وسيلة لإختبار الذات و كسر حواجز الخوف اللي بنحطها لنفسنا و كمان بتساعد في التعرف على نفسنا أكتر.

التعليم: لما هنحط نفسنا في مسئولية تحدي هيبقى عندنا دايماً حاجة جديدة نتعلمها عشان نقدر إننا ننفذها. ممكن تكون حرفة أو مهارة جديدة أو طريقة جديدة لحاجة كنتوا بالفعل بتعملوها.

تطوير الذات: سواء في تنظيم الوقت، أو الفلوس أو في تفتيح الدماغ و القراية أكتر، كل ده الشغل اليدوي بيوفروا و مش بس كده، ده بيدي إحساس رائع بالثقة بالنفس و بالفخر بالنتيجة اللي طلعت. غير الميزة الظريفة جداً إن شغلنا بالوقت بيبقاله قيمه أكبر لأن كتر الشغل بيعلي الجودة و بيزود الإمكانيات و السرعة..

كسر الحواجز: عدينا مرحلة، كويس ندخل في اللي بعدها و اللي بعدها و اللي بعدها. المراحل مش هتخلص بس الإحساس ده نفسه جميل، إننا في حياتنا مش واقفين في مكان واحد.

الإبتكار :طبعا مش محتاجين نقول قد ايه الشغل بالإيد بيخلينا نستكشف قدراتنا الابداعية،ونكتشف امكانيات جديدة، و قد إيه إحنا محتاجين ده في حياتنا و خاصةً الأيام دي. غير شئ عظيم جداً إننا بكتر الشغل بنتنقل من مرحله المبتدئين للمحترفين، و ممكن ده يأثر على إسلوب حياتنا بشكل كامل.

المنتجات اللي هتطلع من التحدي دي ممكن نتستخدمهم في إيه؟

إستخدام شخصي

كهدايا

نتبرع بيها

و ممكن نبيعها

و ممكن يطلعلها إستخدام تاني لا كان على البال و لا على الخاطر 🙂

أزاي ممكن تشارك فى التحدي؟

حطوا خطة لنفسكم و تواصلوا معانا عن اللي نفسكم تعملوه و تتعلموه و عن خططكم سواء القريبة أو  و البعيدة. ابعتولنا منتجاتكم في اخر كل شهر على رسائل صفحتنا فى الفيسبوك واحكولنا ايه اللي اتعلمتوه و ايه اللي استفادتم منه خلال الشهر ده، وهننشر على صفحتنا وعلى حسابنا على بنتريست منتجاتكم وكمان تجربتكم..

في أخر كل شهر هنعمل مسابقه للمنتجات و اللي هياخد أصوات أكتر له هدية أو giveaway من غزل بنات.

و كمان هيبقى في هدية تانية تقديرية لأكتر حد تعب أو إتعلم حاجة جديدة أو عمل حاجة مبتكرة، حتى لو مأخدش عدد كبير من الاصوات.

ليه منبقاش زي الناس اللي بنحسدهم و نفسنا نبقى زيهم؟ و ليه منعملش زي الحاجات اللي بنشوفها في الصور؟

شاركوا أصحابكم و قرايبكم وولادكم معاكم ووصلوا الفكرة لكل الناس اللي نفسها تعمل حاجة . مش بس ممكن تشاركونا  بمشاريعكم ممكن بأفكاركم و بتشجيعكم..

مين مستعد يشارك و يبدأ معانا؟

You may also like...

شاركنا برأيك