ترتيب وتنظيم الملابس الموسمية

8107a605b7e82893c930d7098dc2be2c

تعرفي ايه هو الـ Spring Cleaning؟

في الوقت دا من كل سنة، بلدان كتير فى العالم بتعمل حاجة اسمها “Spring cleaning”
حاجة كدا زي تنضيفة العيد عندنا..
لكن مش بتكون بس للتنضيف انما كمان لتنظيم وترتيب البيت..
احنا كمان بنعمل دا، لكن الموضوع عندنا بيقتصر على ترتيب وجرد الملابس، وتخزين ملابس الشتاء وتنظيم وترتيب ملابس الصيف.
ولان الموضوع مش دايما سهل، ومحتاج وقت ومجهود عشان نطلع بنتيجة مرضية، قررنا نساعدك فى ترتيب الملابس السنة دي..

أول خطوة وعشان ما نحبطش من التفكير فى ترتيب ملابس أكتر من فرد فى البيت، خلينا نقسم الشغل ونركز على حاجة حاجة..
ابدأي الاول بدولابك، طلعي كل الملابس اللي فيه وافرزيها.
الشتوي اللي هنخزنه يكون فى جنب، ويكون مغسول، لان احيانا لو الملابس مش مغسولة بيكون فيها بقع، ومع الركنة لحد ما تتلبس تاني، للاسف البقع دي صعب تطلع.
كمان نطبق الملابس على ظهرها، عشان نحميها من الاتربة.

اما الصيفي فيتقسم حسب النوع، يعني البنطلونات لوحدها، الفساتين لوحدها وهكذا..
ووقت التعليق والرص جوا الدولاب نرتبهم على حسب كتر استخدامنا لكل قطعة..

ومن الافكار اللطيفة فى تعليق وترتيب الملابس الفكرة دي

245039cde366de3df1eaeb91270d2ccb

الفكرة مفيدة جداً للخزن اللي دلفها ضيقة وما بتسحمش بتعليق عدد كافي من الملابس.

ومن الخطوات الاساسية فى كل مرة بنرتب فيها ملابسنا، نطلع كل الملابس اللي ما بنستخدمهاش لحد تاني يستفيد بيها أكتر.

وبالاضافة للثواب الكبير وادخال السرور على أطفال او ناس محتاجة، كمان هنرتب وننظم ملابسنا بشكل أفضل بكتير.

في ملابس ما بتحتجش تفكير في ان دا وقت الاستغناء عنها، وفي غيرها يمكن ما اتلبستش من سنة، و بنحتار، هل نطلعها لحد يستفيد بيها أكتر ولا هنحتاجها تاني؟!

عشان نحل المشكلة دي، اول حاجة جربوا شكل الملابس عليكم، ممكن حاجة يكون شكلها اول ما اشتريناها ممتاز، لكن ولانها مركونة بقالها فترة يكون شكلها اتغير علينا، وأصبحت مش مناسبة.
لو شكلها فعلا مش مناسب يبقى نديها لحد يستفيد بيها اكتر منا..

طيب لو لسه مترددين؟

تعالوا نخزنها فى مكان بعيد عن دولابنا، كيس او كارتونة، ونشيله فى مكان تاني، لو مر علينا 3 شهور من غير ما نفتكر او نحس اننا عايزين نستخدمها، يبقى نطلعها فوراً!

بمجرد ما بنخلص ترتيب دولاب الملابس الخاصة بينا وبنشوف الفرق والشكل الجديد، هنتحمس ونكمل الباقي..

شاركوا أطفالكم التجربة دي في كل مرة، خلي الطفل يساعد ويختار يطبق ويرتب ازاي، والاهم نخليه يختار حد ادنى من قطع الملابس يقرر بنفسه  يشاركها مع محتاج..

في أفكار كتير كلنا بننفذها ف الوقت دا من السنة، شاركونا بأفكاركم وتجاربكم فى ترتيب ملابس كل موسم، وقولولنا ايه الجمعيات والاماكن اللي متعودين تبعتوا الملابس عليها عشان تتوزع..

Miada Ibrahim

مؤسس غزل بنات.. بحب كل الافتكاسات والاشغال اليدوية.. خياطة، تريكو، كروشية او تطريز..

You may also like...

شاركنا برأيك