تصميم بسيط من التطريز للمبتدئين

1538702_10152093686497162_1635670039_n

بقالي فترة بحاول أتعلم مهارات يدوية جديدو وأنمي مهارات كانت عندي ومنها التطريز فكنت بقضي ليالي أتفرج على الصور وأدور خاصة على موقع بنترست

لحد ما خدت خطوة وجبت الخيط وبمساعدة موقع عليه الغرز سهرت ليلة أطرز القطعة البسيطة دي.. بسيطة بس سعادتي بيها كانت مش بسيطة 🙂

المستوى

 مبتديء

الوقت

2-3 ساعات حسب سرعتك

الأبعاد

19 سم عرض × 20 سم طول

الخامات المستخدمه

• قماش كستور أبيض، يفضل تغسليه قبل ما تشتغلي لأنه بينكمش بعد الغسيل

 • خيوط تطريز قطن أو أي خامة تانية نمرة انجليزي [8/3] أو [905/3]

• إبر تطريز  – وخدي بالك لما تشتري تقولي للبياع إنك عايزة إبر تطريز خيط مش شك وتطريز وتكون فتحة الخيط فيها كبيرة

• تاره –  والتارة إطار دائري بنشد عليه القماش واحنا بنطرز، مهم للمبتدئين وليه أقطار مختلفة، يفضل تبتدي بقطر صغير الأول عشان تقدري تتحكمي فيه

• روليت: ودي الأداة الصفراء في الصورة.. بتساعدك في تنقيط الخطوط اللي هتطرزي عليها عشان الغرز تطلع متساوية

• مسطرة أو متر لقياس أبعاد القماس قبل القص

• ورق كاربون: بنستخدمة في نقل الرسمة على القماش

• ممكن تستعيني برسمة جاهزة أو ترسمي بنفسك

ممكن نشتري كل الأدوات من محلات الكلف والزراير، أما القماش فمن محلات القماش ويفضل الرجالي أو البطانات لأن عموما نوعيات القماش المطلوبة في الأول لازم تكون تقيلة

بالنسبة للباترون فأنا مش هكدب عليكم أنا رسمت بنفسي على القماش مباشرة خاصة إن الطابعة كانت بايظة، فيما عدا الكلمات كتبتها الأول وبعدين استخدمت الكربون في نقلها [حماس المبتدئين]

لكن لو هنتكلم عن الطريقة المعتمدة والصحيحة فانتي بتستعيني برسمة مش بالضرورة باترون وبتحطيها فوق القماش وبينهم الكربون

وتبتدي تعدي بالروليت على خطوط الرسمة عشان تنتج ليكي خطوط منقطة تمشي عليها وانتي بتطرزي ومتقلقيش لأنها بتروح بالغسيل البسيط

ده الموقع اللي ساعدني في عمل الغرز

الغرز المستخدمة كلها بسيطة وبدائية، وهي كالتالي

back stitch:

ودي استخدمتها في كل الخطوط المنحنية أو المستقيمة زي البيت والشمس والغيوم وحتى الكلمات، وبتتميز بقدرتها على إنتاج خطوط رفيعة ورسم المنحنيات

Lazy Daisy Stitch:

ودي استخدمتها في رسم بتلات الورد وزي ما ظاهر من اسمها ده استخدامها الأساسي لكن الشكل ممكن توظيفه طبعا زي ما نحب

Radiating Stitch

استخدمتها في رسم ساق الوردة وفي غرز كتير ممكن تسمح برسم الساق بس أنا اخترت دي لسهولتها

Arrow Head Stitch:

أما الغرزة دي فده شكل محور ليها واستخدمتها في رسم الزجزاج قدام البيت

أتمنى الموضوع يكون سهل ويكون حافز للناس اللي حابة تبتدي تتعلم وتعمل شغل بنفسها

شاركونا بتجاربكم ، اتعلمتوا تطريز ازاي؟

You may also like...

شاركنا برأيك