طريقة عمل جراب موبيل تريكو

mobile case group logo

النهاردة هنتعرف على طريقة عمل جراب موبيل تريكو. الموضوع مش صعب، ويناسب المبتدأين اللي يقدروا يعملوا غُرزة البداية، او الدرب التحضيري “Cast on” ، الغُرزة او القطبة الامامية “Purl Stitch” و الغُرزة او القطبة الخلفية “Knit Stitch”. هنتعلم مع بعض ازاي نشتغل بالإبر المدورة “Circular Needles”

الجراب ده لموبيل بمقاس 5 إنش، فاستخدمت أبرتين مدورين مقاس الواحدة 4 مم.

والسؤال ليه ابرتين؟

لما بنستخدم الابر المدورة بالذات بيكون عندنا مشكلة في عمل المشاريع الصغيرة لأن دوران الابرة كبير. في طريقتين، يا اما بنعمل حاجة اسمها الحلقة السحرية “Magic Loop”، ودي بتكون عن طريق شد السلك اللي بين الابرتين في نص الشغل، وطريقتها بالشكل ده.

والطريقة دي بفضل استخدمها في عدد الغرز اللي بيوصل لـ 100 مثلا. اما في طريقتنا هنا عدد الغرز اللي عملتها كان 36 فطريقة الحلقة السحرية هتكون متعبة جداً. عشان كده استخدمت طريقة تانية، وهي الشغل بأبرتين مدورين. الموضوع يبدو معقد حبتين، لكن في الواقع الشغل بأبرتين ممتع وسهل جدا. اللي بنعمله اننا بنبدأ الغرز في ابرة واحدة، وبعدين ننقل نصها للابرة التانية و….
طيب نشوف الطريقة أسهل.

 باترون جراب موبايل تريكو

3 غُرز خلفية وغُرزة أمامية 3k,1P لعمل نقشة الريب. نفضل نشتغل للطول المناسب للموبيل، في حالتنا دي اشتغلت 17 سم.

بنشتغل بالالوان اللي نفضلها، لكن لو حابين نعمل نفس التقسيمة، فأطوال الالوان كانت الرمادي في الاول 1 سم، الموف بعده 1.5 سم، الاوف وايت 1 سم، البينك 2.5 سم، رمادي نصف سم، مووف 1سم، اوف وايت نصف سم، بينك 1سم، واخيرا رمادي 8 سم. وبرضة بفضل اشتغل بالاطوال بدل عدد السطور عشان اللخبطة.

بعد ما بنوصل للطول المناسب بيجي وقت تقفيل الشغل. في الابرتين المدورين هيكون التقفيل مختلف شوية. أول خطوة هنقلب الشغل بحيث تكون غرز التقفيل في الجزء الداخلي مش الخارجي
وهنختار أبرة من الاتنين نستخدمها في التقفيل، وكأننا بنقفل شغل بـ 3أبر.

وبكدا نكون خلصنا الجراب. أتمنى تجربوا الطريقة دي لانها فعلا ممتعة
مين ناوي يجرب معانا؟

Miada Ibrahim

مؤسس غزل بنات.. بحب كل الافتكاسات والاشغال اليدوية.. خياطة، تريكو، كروشية او تطريز..

You may also like...

شاركنا برأيك