طريقة عمل سلة كروشيه

photo3-300x300إنهاردة جيبتلكم طريقة عمل سلة كروشيه، ميزة السلة أن طريقتها سهلة وسهل التحكم في حجمها. دورت على طريقة السلة دي بعد ما لقيت حاجات كتير على مكتبي عاملة زحمة وحبيت ألمها وتفضل برضه على المكتب. طبعا تقدري تزوقي السلة بوردة الكروشيه مثلا اللي هنا.

الطريقة جيبتها من فيديو على اليوتيوب شرحه واضح وبسيط*

المستوى :
مبتدىء

الادوات :
– خيط متوسط 4  (DK)
– إبرة كروشيه   مقاس 7 مم
– مقص
–  علامة للغرزة (أنا إستخدمت هنا خيط بلون تاني)

الوقت :
نص ساعة إلى ساعة حسب الحجم

المقاس :
حسب اللي يناسبك

الاستخدامات:

ممكن تحطي فيه أزايز المانيكير والأكسسوارات أو أي حادة تانية على مكتبة وممكن تعمليه لنفسك أو تعمليه هدية لحد

الطريقة :

أولاً: زي ما هتشوفي في الفيديو، هتبتدي ب 3 غرز سلسلة وتقفليهم بغرزة عشان تكوني دايرة،  بعد كده هتعملي 12 غرزة فردية (sc) من وسط الدايرة، بعد ما تخلصيهم هتلاقي أن بقى في فتحة في الوسط كبيرة وعشان تقفليها شدي ديل الخيط شوية لحد ما تتقفل

ثانياُ: هتبتدي اللفة الأولى بأنك تعملي غرزة فردية بعدها غرزتين في نفس الغرزة (increasing stitch) لحد ما تخلصي اللفة، بعدها هيكون عندك 18 غرزة، هنا تستخدمي علامة للغرزة (أنا استخدمت خيط بلون تاني زي الفيديو)  وتبتدي اللفة تانية اللي هتكون غرزتين فرديتين بعدهم غرزتين في نفس الغرزة.

photo1 (2)

لاحظي أن لفة رقم 2 بقت غرزتين وغرزتين في غرزة ولفة 3 هتبقى 3 غرز وغرزتين في غرزة وبعدين لفة 4 ب4 غرز وغرزتين في غرزة وهكذا. خلي بالك أنك بتدخلي الأبرة تحت اللفتين بتوع الغرزة، ومع كل لفة غيري مكان العلامة عشان متتلخبطيش

ثالثا: لحد ما توصلي لحجم القاعدة اللي أنتي عايزاه هتبتدي تعملي غرز بشكل تاني عشان ترفع القاعدة. غيري مكان علامة الغرزة ودلوقتي هتعملي غرزة فردية بس في الجزء الخلفة من كل غرزة يعني مش ح تحطي الأبرة تحت الغرزة كلها زي قبل كده (بصي على الفيديو) وهتلاقي الحافة أبتدت تطلع زي كده، كل الغرز في المرحلة دي غرز فردية وشوفي الطول المناسب لحد ما تخلصي

photo2

رابعا: (إضافة) ممكن تغيري الألوان هنا وتعملي أخر جزء من الحافة بلون تاني أو ممكن تعملي وردة الكروشيه وتخيطيها على السلة من بره

ده شكل السلة بتاعتي

photo3

يا رب يكون أول موضوع ليا هنا عجبكم وتعملوه وتتبسطوا بيه.

* لينك الفيديو هنا

Fantosh

محررة بفريق غزل بنات الكروشيه والتريكو حلم حياتي اللي أتعلمتهم متأخر لسه بتعلم وهفضل أتعلم‎

You may also like...

شاركنا برأيك