كل ما تريد معرفته عن الصلصال الحراري

Picture-120-998x10241

يعني إيه؟

الصلصال الحراري (polymer clay) هو حاجة شبه الصلصال العادي، مع شوية فروق. أولاً بيكون قوي في الأول وبيحتاج إننا نعجنه كويس لحد ما يطرى ونقدر نشكله زي ما إحنا عايزين. ثانياً، بعد ما الشكل اللي عايزين نعمله يخلص، بندخله الفرن فيتماسك وينشف ونقدر نستخدمه من غير ما لونه أو شكله يتغيروا.

شكله إيه؟

5

الصلصال الحراري ليه كذا نوع (ماركة) المتوفر في مصر بشكل واسع منه نوع إسمه “فيمو”. ألوانه كتير جداً، في ألوان باستيل، وألوان داخل فيها لمعة، ولون شفاف (الشفافية بتظهر بعد ما يطلع من الفرن).  

  كمان فيه نوع بيكون ناشف أوي (كلاسيك) وده بيحتاج عجن كتير قبل ما يبقى سهل تشكيله، ونوع تاني (سوفت) وده بيكون أطرى شوية فبياخد مجهود أقل في العجن.

وفيه نوع بينور في الضلمة، بجد 🙂

إيه الفرق بين الكلاسيك والسوفت؟

مفيش فرق في المنتج النهائي، لو السوفت متوفر طبعاً بيكون أحسن عشان تقليل وقت ومجهود العجن.

 أشتريه منين؟

الصلصال الحراري للأسف مش منتشر في مصر، لكن موجود في مكتبات المعايرجي. المربع الواحد (٥٦ جرام) بحوالي ١٢ جنيه.

 في أي أدوات تساعدني إني أبتدي أشتغل بالصلصال؟

PC 2

١- ماكينة عجن المكرونة:

موجودة في محلات أدوات المطابخ، وموجودة في “التوحيد والنور”. السعر يتراوح بين ٥٠ جنيه و٢٥٠ جنيه. في منها بموتور ويدوي. طبعاً للبداية مش محتاجين حاجة غالية، ولا محتاجين موتور.

 الماكينة تستخدم في العجن وممكن الإستغناء عنها تماماً. بس عجن الصلصال بالإيد بياخد مجهود كبير الماكينة بتسهله. في ناس مش بتحب نوع الصلصال ده عشان خطوة العجن بتتعبهم، ده حل لطيف بيخلي الموضوع أسهل بكتير.

: ٢- قطاعات البسكويت

لتقطيع الصلصال على شكل معين: قلب، وردة، حروف، أرقام، إلخ..

: ٣- كاتر

لتقطيع قطع من بلوك الصلصال، وتقطيع طولي لبعض الأشكال.

: ٤- لوحة التقطيع

أسهل وأضمن طريقة لتجنب ملامسة الصلصال للأسطح. مش غاليين، وموجودين في كل حتة وخاصةً كارفور.

: ٥- صينية خبز

صينية مخصصة لوضع الصلصال في الفرن، لا تستخدم للطعام أبداً. ممكن تكون صينية قديمة.

: ٦- فرن

للهواة، مش ضروري يكون فرن مخصص للصلصال، المهم يكون فيه مؤشر حرارة. للإنتاج الكتير، يفضل شراء فرن كهربائي صغير لتفادي وجود دخان قد يؤثر على الطعام.

ملحوظة: دول الأدوات المطلوبة للتمرين، طبعاً فيه أدوات تشكيل/ قوالب متطورة كتير، بس مش مهمة للمبتدئين.

هام: أي أدوات/أسطح تلامس الصلصال الحراري ماينفعش تلامس الفم أو

الطعام. لازم الأدوات المستخدمة مع الصلصال تكون منفصلة تماماً عن الأكل.

ممكن أعمل إيه بالصلصال الحراري؟

حاجات كتير أوي: ميداليات مفاتيح، معظم الأكسسوار (حلقان، غوايش، سلاسل بأشكال مختلفة،دبابيس للطرح، زراير، إلخ..)، عرايس، أشكال مسطحة اللي بيتحط عليها الكبايات.

من ضمن الحاجات اللي باحب أعملها، أغطي كبايات الجبنة المطبوخة (الفاضية طبعاً) بمزيج من أي لون مع صلصال شفاف. الزجاج بيدخل الفرن عادي. وبعض ما تخلص أحط فيها شمعة من الصغيرين، شكلها بيكون لطيف جداً.

ببساطة، أي حاجة ممكن تتعمل بالصلصال 🙂

PC

 

 PC-4-1024x768  

image13

 

فيه وقت/ حرارة محددين لوضع الصلصال في الفرن؟

عادة مدة ودرجة حرارة الخبز بتكون مكتوبة على العبوة. بالتجربة والخطأ بيبان لو المفروض نقلل/نعلي حرارة الفرن والتوقيت. يعني لو طلع طري أوي بنزود المدة، لو ناشف بزيادة بنقللها، وطبعاً بتفرق حسب سُمك القطعة.

في حالة خبز أكتر من قطعة في وقت واحد، يفضل إنهم يكونوا تقريباً بنفس الحجم.

من تجربتي الشخصية، أحسن نتيجة هي وضع الصلصال في فرن غير مسخن مسبقاً (بارد) وتشغيله على حوالي ١٠٠ درجة مئوية لمدة ساعة. وبعد الساعة يتساب الفرن مقفول لحد ما يبرد خالص وبعدين نطلع القطع.

ممكن أطفال يستخدموه زي الصلصال العادي؟

مش مفضل، إلا إذا كانوا في سن يقدروا يفهموا إن أثناء اللعب بيه خطر جداً الأكل وملامسة اليد للفم أو العين. إجمالاً يفضل إن الأطفال مايستخدموش الصلصال الحراري غير بعد ما يتخبز ويتحول لصلب.

في مواقع تساعدني بأفكار أو شرح إزاي أستعمل الصلصال الحراري؟

ميزة الصلصال الحراري إن ليه مليون طريقة تشكيل ومليون فكرة. يوتيوب عليه فيديوهات شرح كتير جداً، البحث عن: polymer clay tutorial

وفيه مواقع كتير مجانية بتشرح طرق التعامل مع الصلصال. مثال:

هنا و هنا

You may also like...

57 Responses

  1. Noor says:

    الفكرة دي عجبتني لانها حاجة ممكن اي حد يعملها

  2. zena says:

    شكرا جدا بجد على المعلومات 🙂

  3. ممكن اسال هو فين بالظبط في القاهرة ولما اروح اسال اقول اسمه ايه بالظبط و اسم المكتب ايه اللي ف القاهرة و سعره كام اللي في القاهرة اتمني الرد السريع من فضلك

  4. Sara says:

    طيب محتاجه رد ضروري
    اكيد مش ححتاج فرن منفصل عن بتاع الاكل؟
    انا مش حعمل كميات وممكن ادخل قطعه كل مرة
    بس عاوزة اطمن ان القليل دا مش حيضر بليز

  5. لو سمحتو اقدر اجيبو منين من اسكندرية ؟؟

  6. حلو اوى الفكرة دى
    طيب لو عاوزاة يكون بيلمع احطلوا ايه ؟

    • Marwa says:

      لو قصدك لمعه جليتر فممكن يضاف جليتر بس مش أي نوع لان في انواع بتسيح من الفرن ، وفي أنواع بتغير اللون بتاعخا، فجربي الاول أكتر من نوع مثلا بتاع الميكب بس بعدي عن الجليتر اللي من الفويل.

  7. Yosra says:

    ممكن تقوليلى اعمل ايه عشان بيتحرق منى اجيب توستر نوعه ايه استعملت فويل و ظبط الحرارة زى ما مكتوب و برده التوستر بيحرقه هتجنن

  8. nona says:

    جميل اوووى الموضوع ده بس معلش عايز اعرف اللمعه الشفافه بتبقى ايه انا جربت مانكير شفاف طلع حلو بس بعد كده اشرته بتطلع ففى حاجه تانيه لللمعه الشفافه وبيبقى اسمها ايه واقضر اجبها منين انا من اسكندرية

  9. 987654321AS987654321 says:

    انا عملت الصلصال اكتر من مرة ومبينشفشو ولما اشتريتة من المكتبة لقيتة ناشف والعجينة اللى انا بعملها واعجن فيها بايدى كتير فى الاخر بتشقق منى مش عارفة اية السبب انا بحاول اعمل مشروع صغير فنفسى حد يدلنى بجد عايزة اعمل حاجة تجبلى مصدر رزق من فصلكم عايزة اتعلمها خطوة خطوة وشكرا

  10. جوان says:

    السلام عليكم..هل استطيع وضعه في المايكروويف؟ وهل يمكنني تلوينه بالوان الاكريلك؟

    • Marwa says:

      لا لازم فرن و لتلوين الصلصال حسب لونه مش دايما هيثبت او هيطلع النتيجه المطلوبه بس افضل حاجه ألوان زيت

  11. Rahma says:

    شكراا ليكي جدا ♡ بس متعرفيش طريقه نعمله ف البيت ؟؟!
    انا في الكويت و مش عارفه الحاجات دي فين او هتكون غاليه جدا 🙁

  12. هبة says:

    ايه الفرق بينه طيب وبين الصلصال العادي؟
    انا عايزة اعمل انتيك صغيرة بيه وعايزة اعرف انهي نوع اللي يعيش اكتر

    • Marwa says:

      الصلصال الحراري بيتسخن في الفرن و بيثبت على شكله، فهيكون أفضل مع الأنتيك

  13. yasmin says:

    لو سمحتى انا شوفت شكل عروسه على النت بس يا ترى ايديها ورجلها بيثبتوهم ازاى فى باقى الجسم يعنى هو فى لزق معين ليها ؟

  14. kholoud says:

    انا عايزه ابدء فى تصنيع اكسسوارات بالفيمو بس الاماكن و الاسعار لو ممكن سعر العجينه و تكفى قد ايه و منين اجيب ميدليات او سلاسل لو هعمل اشكال ليها

    • Marwa says:

      للأسف بعد تغير الأسعار وظروف البلد مش متأكده بس خليني أرجعلك لو وصلت لحاجة

    • Sarah says:

      صباح الخير هو الفيمو موجود دلوءتى في مكتبة المعيرجى ب ١٥ جنيه 🙂

  15. amira says:

    فكرة جميلة جداااا بس ممكن انا الونه بالوان ابه ؟

  16. mariam says:

    طب انا معنديش فرن بدرجة حرارة اعمل ايه هل فى حل بديل

  17. mariam says:

    ينفع بعد ماشكل احطله غراء ابيض بدل محوطه فى الفرن
    ارجو الرد من فضلك

  18. Emy says:

    طيب منين اجيب الاكسسورات زي حلق او سلسلة اوحلقان عشان اعملها في العجينة

    • Marwa says:

      هتلاقيهم موجودين عند كل شئ في القاهرة أو اي محلات اكسسوارات بيبعوا الحاجات الفاضية دي

  19. Marian says:

    ممكن اعرف لو عايزه الصق العجينه ببعضها او بقماش الصق باى نوع لصق ؟ يعنى ينفع الغرا الابيض او الاوهو ولا مينفعوش ؟

  20. smile tear says:

    طيب انا من الزقازيق حد يعرف ممكن الاقيه فين

  21. amira says:

    ممكن اعرف ايه ممكن استخدمه فوق الصلصال بعد ما اخرجه من الفرن علشان يعمل طبقة لامعة

  22. yasmin says:

    طيب هو اصلا بيتعجن بايه؟؟ ماء ولا زيت ولا ايه و اعرف منين ان العجينة ناجحت؟

  23. mona hossam says:

    ممكن اصنع بيه اى شكل زى النجمة مثلا وكده ؟ عادى وبعدين اشكله بايدى عادى ميضرنيش ؟

  24. Basma says:

    اكتب علي الصلصال بايه بطريقة احترافيه لما بكتب عليه بالصلصال مبتباقش الكتابه مظبوطه

  25. Asmaa says:

    لو عندك فكرة الفيمو بقا بكام دلوقتي بعد إذنك ، و ايه اكتر ماركة بتطلع شغل نضيف و مظهره ناعم ?? لاني اشتغلت بماركة cernit
    و ساعات كتير لونها بيتغير
    للاسف بعد الفرن و كمان شكلها مش بيبقي ناعم زي حاجات تانية بشوفها

  26. Basant Ahmed says:

    طب لو سمحتى هو فيه ماده معينه الصلصال الحراري. غير الفيمتو

  27. Moamen says:

    لو سمحتي هو بيكون الوان ولا ابيض ويضاف عليه الوان سائله وأسعاره كام حاليا ويتواجد فين

  1. June 18, 2014

    […] نشكل و نحفر على مواد كتير، زي الصلصال، الصلصال الحراري ،الطين الأسواني أو […]

  2. December 29, 2014

    […] المواضيع المفضله لينا برضه هي الصلصال الحراري، واللي يعتبر حرفه جديده نوعياً في مصر وبيتعمل بيها […]

شاركنا برأيك