لف وأرجع تاني

066add4aeda2335596e5884cd146e602
من الافكار السائدة فى مجتمعنا للاسف ان الشغل اليدوي حاجة بيعملها الناس الفاضية، ومجرد حاجة مالهاش لزمة بتتعمل عشان الناس تسلي نفسها..

لكن الحقيقة غير كدا خالص..

أول حاجة هي هواية واستعداد طبعا..

أما تاني حاجة، فالموضوع مالوش أي علاقة  بالفضا او التسالي..

كل البنات اللي بيكتبوا معانا هنا يا بيشتغلوا يا بيدرسوا يا بيعملوا الاتنين مع بعض..

ومع ذلك بنحاول ننظم وقتنا، واحيانا نضغط نفسنا عشان نقدر نمارس الهواية اللي بنحبها.

غير ان الشغل اليدوي، سواء خياطة، تطريز، تريكو، كروشية أو اعادة التدوير بتحتاج مجهود ذهني فى الحسابات والرسم والشغل على الفكرة نفسها، وأزاي مفروض ناخد كل حاجة فى الاعتبار مهما كانت صغيرة عشان الشغل يطلع مظبوط..

ومع إن الهواية دي بتاخد منا وقت ومجهود، إلا إنها بتدينا أكتر ..

فكرة ان يبقى عندك شوية خيوط، او قصاقيص قماش، وبأبرة تقدر تجمع كل دا وتطلع حاجة مختلفة، حاجة من تصميمك ومن أختيارك..

ممكن تحطها ديكور، تلبسها تقدمها هدية وتلاقي حد تاني فرحان بيها أحساس ما يتوصفش.

ومش بس بتحط فى شغل ايدك دا مجهود وتعب وفكرة، لا كمان بتحط فيه احباطك  ومشاكلك..

عشان كدا، وبعد كل مرة بتعمل حاجة جديدة بتحس بشعور مختلف، حاجة كدا انبساط على روقان، واحساسك انك ممكن تعلم أي حاجة..

سعادتك كمان ممكن تضاعف أكتر وأكتر لو حد من اصحابك او أسرتك بيشاركوك نفس الشغف، وممكن تعملوا حاجات مع بعض.

أما بقى لو عندك أطفال  هتبقي بتعملي حاجة بتحبيها وكمان طفلك بيستفيد وبيتعلم مهارات جديد وهيبقى بيقضي معاكي وقت لطيف..

لو عندكم هواية، حاجة بتحبوا تعملوها، احكولنا عنها..

واللي وقف يلف و يرجع تاني ويعمل الحاجة اللي بيحبها..

منتظرين مشاركاتكم

Miada Ibrahim

مؤسس غزل بنات.. بحب كل الافتكاسات والاشغال اليدوية.. خياطة، تريكو، كروشية او تطريز..

You may also like...

1 Response

  1. Sara says:

    جميل كلامك

شاركنا برأيك