معلومات عن ماكينة الخياطة للمبتدئين

keep calm

أول ما جبت ماكينة الخياطة حسيت اني تايهه و مش عارفه أبدأ منين، مع اني مش أول مره أشوف ماكنه ولا أشتغل عليها بس كان في رهبه. من مكنتي الجديده بأجزائها المعقده وكمان إحساسي اني ببدأ من الصفر وعايزه أبدأ صح. ميادة كانت المنقذه، لولا إنها جت فهمتني بعض المبادئ مكنتش بدأت أصلاً. بس بالوقت بدأت أدور وأفهم أكتر بعد كده وده ساهم كتير في كسر الحاجز.

هنا أنا هحاول أساعد ببعض المبادئ العامة* اللي أتمنى إنها تفرق مع أي حد عايز يبدأ ومش عارف يبدأ منين.

مبدأياً في أنواع كتيره للمكن، تشتري إيه؟

ماكينة الخياطه التقليدي جداً

ماكينة الخياطه مع امكانيه التحكم في طول و عرض الغرزة أو وجود غرز اضافيه – زي الزجزاج مثلا أو العراوي أوتركيب  الزراير.

sewing-machine-stitches

ماكينات التطريز المتطور

الأنواع الجديده منها بتتوصل بالكمبيوتر بتستقبل رسومات و غرزللتطريز  و تنفذه

 ماكينة quilting

بيعمل لحاف أو مفارش، أو أي حاجة مكونه من اكثر من طبقه او من تجميع قطع  قماش مع بعضها.

VQ3000

ماكينة السرفلة

ده لا غنى عنه لأي حد بيخيط بس ممكن الاستعانه بوسائل تانيه لنفس الغرض لو انت لسه مبتدئه..

أنا أحيانا بستخدم غرزه الزيجزاج للسرفلة أو بجمع اللي محتاجاه يتسرفل و اوديه لحد متخصص يعملها.

1-1034d

  اشتري ماكينة الخياطة حسب احتياجك و خبرتك لأنك لو جبتي ماكينة متطوره ممكن متعرفيش تستخدميها لو كنتي مبتدئه، ابدئي بحاجه بسيطه و لما مستواكي يتطور ممكن تجيبي حاجه أعلى متخصصه في الإتجاه اللي انتي عايزه تكملي فيه.

الكتالوج 

عارفين الكتالوج اللي ملوش لازمه اللي بيترمي مع كرتونه أي حاجه جديده؟ أيوه ده، لازم تقروه عشان تفهموا أجزاء الماكنه و طريقه تشغيلها و تتعرفوا أكتر على الاجزاء اللي بتشتغل يدوي

المكن بطبيعته مختلف مع ان فكره التشغيل و المكونات الميكانيكيه ممكن تكون واحده بس كل ماكينه ليها إسلوب معين، فمثلا طريقة  ملو المكوك أو الربط أو اسلوب شد الخيط

اتعرفي على مكونات الماكينه الأساسيه بالملاحظه و الاكتشاف مع الكتالوج و جوجل في الحالع دي صديقك الصدوق.

2013-09-18-15.18.33-2-1024x768logo

من المواقف الكوميديه ان الكتالوج بتاع مياده كان جاي بالصيني، مياده معرفتش ازاي  تلف الخيط على المكوك و لحل المشكلة كانت بتعمله بقلم رصاص زي ما كنا بنعمل مع الشرايط زمان 😀

المعيار

 من الحاجات اللي بتسبب مشاكل عند بعض الناس الشد بوجهه عام هو الفكرة الأساسية لماكينه الخياطه و المعيار هو العقل المدبر للشد، مشكلته الأساسية إنة بيتغير يدويا و إنه حساس .لأي تغير، تغيرالرقم  و لو تغير بسيط جدا بيفرق في شكل الغرزة النهائية.

من أكتر الحاجات اللي بتلخبط و بتحتاج وقت في التدريب عليها. أنا شخصيا عانيت كتير معاه بس بالوقت اكتشفت ان الموضوع متغير حسب نوع القماش اللي بنستخدمه و ملوش علاقه بالخبره. يعني بقيت كل مجيب قماش أعمله إختبار معيار الأول.

الغرزة رقم 3 هي نتيجة عملية شد مظبوطة

الموتور

نفس فكره السواقة، محتاج ممارسة لظبط  ضغط الرجل علية. لو لقيتي نفسك مسرعه عادي،، بالوقت هتظبطى.

الخياطه في خطوط مستقيمه

محتاجه خبره و تدريب، و دي بعض الطرق اللي ممكن تعمليها عشان تدربي نفسك.

الخياطة على ورق مسطر

ممكن نلزق سيلوتيب كعلامة لطرف القماش

2013-03-12-18.30.36-1024x7681-739x1024logoلنصائح ومعلومات أكتر عن الخياطة للمبتدئين

ولسه في الخياطة بقية، تابعونا >>

Marwa

{عضو مؤسس/Creative Director} ‫درست و بتشتغل في مجال الهندسة المعمارية بالنسبة لها الفن إسلوب حياة، و عمل حاجات جميلة من اللاشئ هو اللي بتعيش عشانه بتشتغل تريكو، كروشيه، خياطة و أشغال ورقية، وحاجات تانية متنوعة‬‎

You may also like...

5 Responses

  1. موضوع حلو بجد…جووووو اون

  2. dorra says:

    حلو جدا

  3. Marwa says:

    شكراً ليكم 🙂

  4. khadeeja says:

    موضوع جميل

شاركنا برأيك