5 نصائح عن الخياطة للمبتدئين

هذا المقال مترجم. يمكنك الرجوع للمقال الأصلي هنا.

لا أعتبر نفسي أفضل شخص في العالم بالخياطة. ولكن بقالي سنين بعملها واتعلمت بعض الحاجات وحاسة أني ممكن أشاركها معكم. (ملحوظة: أنا أبتديت الخياطة وأنا عندي 8 سنين لما جدتي أدتني علبة خياطة قديمة الخاصة بها، وقتها مشروعاتي كانت مقصورة على أني أقطع رجل البنطلونات الجينز وأخيط الوسط عشان أعمل شنطة جينز شكلها وحش. كنت فكراها جميلة وأنها هتكون سبب شهرتي في يوم من الأيام)

لو أنتي زي وعلمتي نفسك الخياطة يبقى عارفة أنها عملية متدرجة، تتضمن أنك تلاقي معلومات عشوائية بمرور الوقت فتحسن طريقتك ومستواكي. ودي قائمة بالحاجات اللي كنت أتمنها أني أعرفها بدري وبعض مقالات من مدونات ساعدتني:

1.أهمية الكي والكي بالبخار لمشاريعك

أنا لحد سنة تقريبا مكنش عندي مكواة ودي حاجة محرجة أني أعترف بيها. لما كنت بشتغل على تدريب للخياطة كنت بمر مرور الكرام على جزء الكي وكأنه مجرد توصية. يمكن كنت خايفة خطيبي يطلب مني أكوي كل هدومه لو كان عندي مكواة. كانت غلطة ولكن شراء مكواة غير مكلف ومبياخدش منك وقت أنك تكوي المشروع بتاعك. أهمية إن إزاي مشروعي بيبقى شكله أنيق وإحترافي بعد الكي أكبر بكتير من قلقي من كي هدوم خطيبي. كل صفوف الغرز بقت مستقيمة لأن القماش مبقاش مكرمش والقطع اللي بتكون مطبقة، زي المحفظة المتطبقة من النص أو أي قطعة تكون بتتني بتفضل مكانها بسهولة. ومن ساعة ما عرفت عجائب الكوي ابتديت أكوي مشاريعي وأنا بعملها أكتر من مرة. وفي الآخر بستخدم خاصية الكي بالبخار لمشروعي في النهاية بالكامل. هتلاقي أن شغلك بقى شكله جميل ولامع بالكي وعمرك ما هتستغني عن المكواة تاني.

2.صديقتي العزيزة الجديدة…البطانة

البطانة هي عبارة عن قماش بيدي وزن وثبات لمشاريعك. البطانة لها نوعين مختلفين: لاصقة (بيكون فيها نقط صمغ صغيرة على جانب واحد منها ولما بتكويها بتلزق على ظهر القماش، وفي نوع تاني بيتخيط في القماش. قبل ما أكتشف البطانة اللاصقة كنت لما بشوف تدريب  بيطلب إستخدام بطانة كنت بستخدم صوف ناعم. الصوف كان بيؤدي الغرض في رأي ولكن لما تبتدي تستخدمي البطانة اللاصقة عمرك ما هترجعي للصوف تاني. البطانة ليها سلبيات زي أنها بتاخد وقت عشان تلزقيها في القماش وأنها بتاخد وقت في القياس والقطع وأنها طبعا مصاريف زيادة ولكن مع كل ده بتدي شكل رائع لمشروعك وبتكون تستحق التعب والفلوس. بالنسبالي أنا عندي علبة كبيرة مليانة بأنواع مختلفة من البطانة دلوقتي.

3.استخدمي الدبابيس للتثبيت

هتلاحظي أن في معظم التدريبات بتطلب منك أنك تثبتي مشروعك في مرحلة ما (غالباً بيكون أثناء القص والخايطة). أتعلمت من خلال تجربتي أن لما يتطلب منك أنك تستخدمي إبر يبقى لازم تستخدميها. قبل كده كنت فاكرة أني ممكن مستخدمش الإبر وأني قادرة أمسك القماش مظبوط وأنا بخيطه وأن استخدام الإبر غير ضروري. ولكن مع كل اللي بتحاولي تعمليه وأنتي بتخيطي زي أنك تبطئي ضغطتك على الدواسة وأنك تاخدي بالك أنك بتخيطي في خط مستقيم وأن القماش متساوي وإحساسك انك مركزة مع الإبرة وهي طالعة ونازلة فبيكون أحسنلك أنك تستخدمي إبر في مشروعك عشان على الأقل تكوني أرتاحتي من القلق على حاجة من كل الحاجات دي. نصيحتي أنك متجيبيش إبر شكلها حلو وبس لأنها عادة بتكون تخينة وصعبة مع القماش، أشتري إبر شكها عادي بس تكون رفيعة وحادة هتكون إضافة رائعة لعدة الخياطة.

4.استثمري فلوسك في كاتر دائري ولوح تقطيع ومسطرة شفافة

الكاتر الدائري ولوح التقطيع والمسطرة الشفافة هيخلوا حياتك أسهل مليون مرة عند تقطيع القماش. التلاتة هيسهلوا عليكي أن خطوطك تكون مستقيمة وأنك تقطعي أكتر من طبقة من القماش في وقت واحد. نصيحتي لتوفير الوقت هي أني لما بحتاج أقطع أكتر من قطعة من أقمشة مختلفة بنفس المقاس بأبتدي بقياس أول قطعة بطريقة صحيحة وأقوم بكيها جيدا وأضعها على باقي القماش وأستخدم المسطرة على الحرف وأقطع القماش الباقي على مقاس القطعة الأولى. النقطة دي بتوفرلك وقت قياس كل قطع لوحدها وقطعها طالما أنك ظابطة القماش فوق بعض كويس ومستخدمة المسطرة في القطع يبقى هتلاقي أنك وصلتي لنفس النتيجة لو كنتي قطعتي كل قطعة لوحدها وفي وقت أقل.

5.اعملي باترون خاص بيكي

لما بلاقي تدريب عجبني وحبيته وبحس أني ممكن أعمله تاني بحتفظ بالباترون على كارتونة عشان أوفر وقتي لما أحتاج أعمله تاني. مثال: في التدريب بتاعي عن المحفظة بسوستة  لأني عارفة أني هأعمل المحفظة دي كتير تاني في المستقبل فبحتفظ بكرتونة بالمقاس ده في الدولاب وبالتالي لما أحتاج أعمل المشروع ده تاني هيكون كل اللي عليا أني أقيس عليها القماش الجديد والبطانة بدلا من أني أقيس من أول وجديد. عندي علبة مليانة كرتونات كاتبة عليها مقاسها وأسم المشروع بتاعها وكنت كل ما أشتري جزمة جديدة أحتفظ بعلبتها عشان أستخدم الكرتون عشان أعمل به قطع باترون.

إقرأي أيضاً: ٥ طرق لإنهاء الخياطة بواسطة الماكينة العادية

المقال له جزء تاني، تابعونا..

Fantosh

محررة بفريق غزل بنات الكروشيه والتريكو حلم حياتي اللي أتعلمتهم متأخر لسه بتعلم وهفضل أتعلم‎

You may also like...

شاركنا برأيك