٥ أفكار عملية وبسيطة لتنظيم أدوات الخياطة والتطريز

إذا كنتى بتحبي الخياطة والتطريز أكيد هتلاقي إن واحدة من أوض بيتك – إذا ماكانش البيت كله – اتحولت لمهرجان من الأقمشة و الخرز والخيوط وغيرها من الأدوات والخامات اللي بيحتاجها الشغل ده واللي لو متنظمتش بشكل دائم بتتحول لفوضى رهيبة بتوصل أحيانا لإن الحاجات بتختفي في الدوشة ويبقى نصف وقتك ضايع في إنك تدوري عليها.. لو بتواجهي المشكلة دي هتلاقي في السطور التالية مجموعة أفكار عملية وبسيطة لتنظيم أدواتك وخاماتك بأقل تكلفة ومجهود:

  • الصناديق ثم الصناديق ثم الصناديق:


صديقك الأول في موضوع تنظيم أدوات الأشغال اليدوية هو الصناديق بأشكالها وأحجامها المختلفة لأنها بتمثل حل رائع لتجميع وتنظيم الخامات والأدوات. والأحسن إنه يكون عندك مجموعة صناديق بأحجام مختلفة بحيث تقسمي و تنظمي الخامات في الصناديق الأصغر وتجمعيها داخل الصناديق الأكبر. مثلا الخيوط في صندوق، الخرز في صندوق، الأدوات في صندوق..الخ. وحتى لو عندك دولاب أو مكان مخصص لحفظ الخامات فالصناديق هتساعدك في تنظيمه بسهولة وتجنب الفوضى والكركبة جواه.


تقدري تشتري صناديق بلاستيك أو قماش water proof من محلات الأدوات المنزلية أو الهايبر ماركت وممكن طبعا تعتمدي على الصناديق الكرتون العادية بتاعة الشيبسي والبسكوت وتجمعيها بنفسك أو تشتريها بأسعار بسيطة من السوبر ماركت. ولو هتعتمدي على الصناديق الكرتون ممكن ترسمي عليها وتزينيها عشان تدي مظهر متميز وجميل.

  • العلب الصغيرة:


بالإضافة للصناديق هتحتاجي مجموعة من العلب البلاستيك أو البرطمانات الصغيرة لأنها هتساعدك جدا في تنظيم الخامات الصغيرة زي الخرز والترتر والإبر والزراير. والعلب دي إنتي بتقسمي فيها الخامات وبعدين تجمعيها جوا الصناديق حسب نوع الخامات اللي موجود فيهم.

تقدري مثلا تستخدمي علب الكريم بعد غسلها أو تشتري مجموعة من علب حفظ الطعام بأحجام صغيرة ودي بالذات مفيدة لأن غطاها محكم ومش بيتفتح بسهولة. كمان ممكن تستخدمي البرطمانات الزجاج الصغيرة ودي ميزتها إنها شفافة فا هتقدري تشوفي اللي جواها من غير ما تفتحيها لكن عيبها إنها ممكن تتكسر بسهولة فا لازم تتعاملي معاها بحرص.

  • الصواني المقسمة ومنظمات الأدراج:


الصواني المقسمة لأجزاء زي اللي بتستخدم لتقديم المكسرات أو منظمات الأدراج اللي بتستخدم لتنظيم المجوهرات والماكياج رائعة في تنظيم الخامات الصغيرة خصوصًا أثناء الشغل لأن الخامات هتبقى منظمة وواضحة قدام عينك. مثلا لو إنتي بتطرزي تقدري تحطي كل لون خرز في خانة من خانات الصينية أو لو بتخيطي هتحطي الإبر في خانة والخيط في خانة والأزرار في خانة..الخ. الصواني دي هتلاقيها موجودة في محلات الأدوات المنزلية أو محلات الديكور واكسسوارات المنزل.

  • البكر الكرتون:

البكر الكرتون بتاع مناديل المطبخ والحمام وورق الفويل وغيرهم بيبقى مفيد جداً لو عندك كومة كبيرة من الخيوط المتداخلة في بعضها لأنك تقدري تلفي عليه الخيوط وتفصليها عن بعض وده هيمنعها من إنها تتداخل وتتشابك تاني. وعشان تتأكدي من إن الخيوط مش هتفك من على البكرة تقدري تلزقي طرف الخيط الأخير بشريط لاصق – سيلوتيب -. ونصيحة تانية مهمة هي إنك تحتفظي بمجموعة من بكر الخيط الصغير بعد ما يفضى لأنه هيساعدك في فصل وتنظيم الخيوط الرفيعة وبواقي الخيوط.

  • العلامات الورقية:


العلامات الورقية اللاصقة مفيدة في تقليل وقت التدوير على الحاجات لأنك لو لزقتي على كل علبة أو صندوق ورقة مكتوب فيها اسم الحاجة اللي جواه مش هتحتاجي تفتحي كل العلب عشان تلاقي حاجة واحدة. والعلامات دي ممكن تشتريها جاهزة من المكتبات وتكتبي عليها وممكن تشتري أفرخ ورق ستيكر وتطبعيها عندك في البيت لو عندك ماكينة طباعة – printer – وده هيتيحلك إنك تعمليلها تصميم متميز.. أو ببساطة تقدري تقصي مربعات ورق عادية و تلزقيها على كل علبة أو صندوق.

You may also like...

شاركنا برأيك